有同学问我：“你住喺广州边个区口架？”我都会毫不犹豫噉答佢：“东山区！”“东山区唔係冇咗咩？唔係畀越秀吞咗咩？”每次听到噉嘅说话，都会深深噉伤咗我嘅心。

或者，有人会话，只不过係一个简简单单口架区名啫，有必要咁肉紧咩？或者佢地讲得啱，但，我永远嘅东山区，一切都喺唔会变口架，佢唔单止係一个区名咁简单！

印象好深，东山改名嗰年，啱啱我参加高考。有一日，我喺课室复噉习，有个同学问我：“你知唔知东山区冇咗啦？”我手入面嘅笔唔知点解就再都抓唔稳了——个心好痛，一千个为什么一直喺我心里面不断噉重复。后来，高考填报志愿，我隔篱位问我，我哋应该填东山区定係越秀区啊？当时，我好无奈。

后来，发现政府办公大楼都改名了；望住手中嘅户口簿、身份证，上面一个简简单单嘅东山分局嘅印章，都令我有着无限嘅感触；旧年，一年一度嘅花市，抬头望嗰时，发现，花街改成越秀区东湖花市嘞，突然间，我心里面有阵莫明嘅伤感……

仲记得细路仔嗰阵，成日去屋企附近嘅东湖公园玩。嗰度嘅九曲桥，东湖上泛住嘅一叶叶扁舟，转角处，好多伯伯喺度钓鱼……

读书嗰阵，好多好朋友都係喺东山呢度认识嘅，玩伴，书友，好多都好耐冇见，但一有时间，我哋都愿意喺曾经嘅东山街头行下街，重拾嗰段东山情怀。

好唔舍得东山区。东山，唔单止係一个区名，佢承载嘅係我嘅回忆，一个我再也冇可能重拾嘅童年，无数人心中嘅骄傲……

我嘅屋企，住喺东山。呢一点，永不改变。

这样的故事，

很多，

因为，

有一种情节，叫东山

......

城记广东，一直在路上