终于揾到一日黎禄运茶居啦,听闻节假日排队排到丧，于是等到工作日午市先去，呢个决定系啱既，因为始终都有位。2个人坐4人台，唔需要搭台，而且套餐个7碟点心都够地方摆。 坐底验证俾钱后好快就上菜了，菜单个度茶位有三个价钱段，最平6蚊，最贵10功夫茶，我地个餐系中间8蚊既，我理解就系加料茶，有几种选择：小金柠（即系红茶+柠檬），小青柑（普洱+青柑），桂花+铁观音……我就要红茶+一只干柠檬，开始时就饮到红茶，浸得越耐先饮到柠檬香同d“劫”味。 因为有7个点心，我地知道肯定食唔晒，所以先食晒d打唔到包既，打到包既推到最后有余力先食。 咸香鸡丝鱼茸粥第一个上，粥底几棉，少少鸡丝同鱼肉，味道清淡。 金牌虾饺皇，一笼三只，特登剥开只虾饺皮数数，里面竟然有7粒虾仁，啖啖都系虾肉啊，店家惊s唔够爽，面头仲要撒虾籽添。 豉椒蒸凤爪，有dd辣，够霖够入味，合格。 云南小瓜金钱饺，将d云南小瓜剁到细过米粒，同猪肉捞埋一齐做饺子馅，呢个点心比较清淡。 脆皮有机红米肠，又系虾肉！包住炸脆，再裹红米肠皮，因为虾肉炸过又包肠粉有的油腻，肠粉本身味道又清淡，配左一碟豉油一碟芝麻酱，点豉油食感觉一般，点芝麻酱食呢更加“笠口”，提个建议不如配碟喼汁或者醋，酸味酱汁可以解油腻又开胃。 脆皮葱油饼，里面系葱粒，外面皮炸脆，新鲜食几香口松软=热气，所以一件就收手。 剩低红枣糕同葱油饼打包。